চিহ্ন নতুন - হিমাশ্ৰী বৰা

কলকলনিয়ে জীয়ন দিয়া

থূপুক-থাপাক বেলি কথা ।

সম্ভাৱনাই পতা মেলে , পোহৰ খেদে

গজালিৰ পৰা বটবৃক্ষ হোৱাৰ লক্ষণ ক'ত ফুটে ?

পলসুৱা মমতা ভৰুণ হৈ উঠোতে

তামোলজোপা সাক্ষী আছিল

শইচৰ উৰুলি , চৰাইৰ চুবুৰীৰ শ্ৰুতিমধূৰ মালিতাই

সৃষ্টিৰ ভূমুক দি পৰ্বান্তৰলৈ ভেবা লাগিল । 

অনামিকাত বিশ্বাস হৈ জিলিকা 

আৰু সেওঁতাত সাহস হৈ বিয়পাৰ পৰত

দুহাল চকুৱে ঘৰ বান্ধে , চেনেহ বাতে 

অপনয়ন-প্ৰতিষ্ঠাপনেৰে সংসাৰ সমীকৰণে সৰলীকৰণ কাঢ়ে । 

কুটি কুটি হোলোঙ কৰিবলৈ বিচৰা পোকটোৰ বিৰুদ্ধে

দেহ-মনৰ চলি থাকে যুঁজ-বাগৰ

সুলক্ষণ , বিলক্ষণৰ নতুন চিহ্নই 

মোৰ নিৰ্বিকাৰ পেনপেননীক নাম দিয়ে 'সহচৰ' ।