ঘুমটি - হিমাশ্ৰী বৰা
নখহা ওৰণিৰ আঁৰত জিলিকে
বোৱাৰী পুৱাৰ বেলি ,
আগনিশা জলপতিত ভিজিল ঘুমটি ।
মোখোৰা পিন্ধা মুখখন শুইছে
বাহিৰত 'আলাসৰ লাড়ু'ৰ ওখহা বাদু
আই অ' , নকঁপাবি বুকু
সতকাই নুঢুকায় পিতাইৰ সাধু ।
গা-ভাৰী নৈখন আৰু মাতঙ্গৰ ভেকাহিত
হাড়ভঙা শ্ৰমে তেবেজা মাৰে ;
তথাপিও হেনো জাপ নোখোৱা চকুৰ এলাইছ ভাৱ নাহে ।
চকু মুদা কুলিৰ ভাওত গভীৰ নিদ্ৰাত কোন ?
হামিয়াই-হিকটিয়াইহে মই জাৰি আছো ঘুণ !
জাগি থকাজনে দেখে জীৱৰ বিলাই
"মায়া শৰ্য্যা মাজে আছয় ঘুমটি যাই" ।
Comments
Post a Comment