ফাগুন বিলাস - হিমাশ্ৰী বৰা

আৰ্জিত এলান্ধুকলীয়া বিভ্ৰমক শিৰে থাপি

কেনে আধুনিকাই প্ৰেমালাপত মজে (?)

তাইৰ জানো ভীৰুৰ পোছাক ফিছিকে (?)

তাইৰ হেনো খেলি-মেলিৰ হিচাপেহে পোৰণি-দেৰণি তোলে ;

মৰহা গোলাপৰ স্বৰূপ বিদাৰি ৰঙা আঁছুহে গৰ্বী

(ফ্ৰেব্ৰুৱাৰীৰ দৈন্যতাত যথাৰ্থই বহাগহে চহকী)

"সোণ অ' - সীমাতে থাকিবি,ভেটিও ৰখিবি" ।

ফুলকোঁৱৰে কাঠৰ পখী ঘোঁৰা চেকুৰালেই যেনিবা

গছৰ মুঢ়াৰনো কিহৰ গৰজ

মিছা ফুলনিৰ মালিনী হ'বলৈকে 

কেনেকৈ দেখুৱাওৱা যাব খেয়ালি দৰদ !

সিপাৰে সৰাপাতৰ খৰমৰণিয়ে দহে

(যুদ্ধভুমিৰ সৈনিকে ধৰাশায়ী হোৱাৰ কথা নাভাৱে)

এইপাৰে কৱচ কাপোৰ দিব নোৱাৰাৰ খেদ

লঠঙা বিৰিখে প্ৰবল কৰি আনে ;

ফাগুন যি বাটেৰে গুচি যাব

সেই বাটেৰেই ধূলি হৈ উৰক আমাৰ নিষিদ্ধ গল্প

বসন্তৰ প্লটত প্ৰত্যাশাৰে আৰম্ভ হওক বৈধ পাণ্ডুলিপিৰ সৃষ্টি পৰ্ব ।